«Аьрекеттинъ кыйынлыгын оьз коьзим мен коьргенлер саныннан»,– деп баслады соьзин Дагестан Республикасынынъ Аькимбасынынъ исин юритуьвши Федор Щукин бу йылгы республикалык август педагогикалык окувларына багысланган йыйында соьйлевин. Белгилеп озайык, элбетте, окытувшыдынъ аьрекети бу куьнлерде енъиллерден тувыл, заман ман бирге коьп зат туьрленеди: талаплавлар, окув стандарты, аьдемлердинъ касиетлери эм керексинуьвлери, ама сол туьрленислер тербиялы несилди оьстируьвге буршав бермеге керек тувыл. ДР Аькимбасынынъ белгилевине коьре, окувшыдынъ билим алувы яшаган ериннен себепли болмага керек тувыл, ол калада яшаса да, шетте бир тав авылында тувыпоьсетаган болса да, ога тийисли билим берилмеге керек. Бу куьнлерде республикамызда оьткен август окувларына багысланган йыйында регионымызда билимлендируьв тармагын оьрлендируьв, яс специалистлерди коьтергишлев акында соравлар коьтерилдилер. – Республикада коьп куллыклар этиледилер: язлык явынлардан мектеб меканларына келген зарарлар калдыклары тайдырыладылар, янъы мектеб меканлары курыладылар, ярастырылмага кереклер, ярастырыладылар. Сол курылыслар тек эсап беруьв уьшин тувыл, яс несилди тербиялав уьшин этилмеге керек. Биз Элди суьйген, тарихти эм маданиятты сыйлаган инсанларды яшавга шыгармага борышлымыз. Бу ерде уьйкен орын окытувшыдыкы болады.., – деди Федор Щукин. Солай ок, йыйында, окувшыдынъ алдында «Ким болайым?» деген сорав турмага керек тувыл, олардынъ окув ошаклары ман байланысын туьзип, туьрли кеспилерди мысаллар негизинде коьрсетилмеге керек экенин де айттылар. Кыскаша айтканда, аьр бир окувшы танълагы куьнде кайдай кеспи ис рыногында керекли болаягын эртерек билмеге керек, соны анълатув окытувшыдынъ борышы болмаса да, зарар келтиретаган ис тувыл. Йолыгыста оьткен окув йылда уьстинликлерге етискен окувшылар саны да айтылды – 57 выпускник Ортак патшалык сынавларын 100 баллга берген, солардынъ аьр бириси мен оьктемсиймиз. Бу окув йыл яс специалистлерге онъайлыклар тувдырады. 2027-нши йылдан алып, яс окытувшыга бир кере 150 мынъ маьнет акшалай берилеек, соны ман бирге «Земский учитель» программасынынъ да яшавга шыгарылувы бардырылады.