Буьгуьнлерде биз согыс спецоперация еринде Аталыкты саклавшыларынынъ куьндегилик баьтирлигине шайыт болып турамыз. Заман ийги дегенлерди сайлаган. «Буьгуьн бизим куьнимиз Аталыкты сакламага», – деп айтадылар олар эм тынышлык уьшин яшавларын курманлык этедилер. Тек дайымларга олардынъ келпетлери бизи мен каладылар. 

Янъыларда Ногай районынынъ Карагас авылында мектебтинъ азбарында ян берген СВО катнасувшылары, выпускниклери Аджинияз Акимовка, Фарид Джумагишиевке, выпускниклердинъ увылы Гамзат-хан Абдуловка мемориаллык такталар ашылды. Шарады ТОКС окувшылар отрядынынъ етекшиси Нурсият Зарманбетова юритти. К.Кидирниязовтынъ атындагы мектебтинъ директоры Насипхан Багавдин кызы Шураева хошлав соьзи мен шыгып соьйледи. Ол выпускниклердинъ акында хабарлады, мундай шаралар яс несилде патриотизм сезимлерин тербиялайтаганын белгиледи. Солай ок шарадынъ сыйлы конаклары шыгып соьйледилер – «Ногайский район» МР аькимбасынынъ орынбасарлары Мурат Шадиев эм Рашид Шангереев, Ногай районынынъ Савытлы Куьшлери эм правосаклав органлары, ис, согыс ветеранлар советининъ председатели Акманбет Сангишиев, район Ямагат палатасынынъ председатели Эльмурза Саитов, Ногай районынынъ Билимлендируьв управлениесининъ етекшиси Амерхан Межитов, Хатын-кызлар советининъ председатели Асият Манкаева, Ногай районында «Аталыкты саклавшылар» фондынынъ социальли координаторы Аскерхан Межитов, «Яслык» яслар орталыгынынъ директоры Абибулла Шамбилов, Карагас авылынынъ согыс аьрекетининъ ветеранлары, ян берген яслардынъ бирге окыган тенълери, кардаш-тувганлары. Мектеб окувшылары Аджинияз Акимовтынъ, Фарид Джумагишиевтинъ, Гамзат-хан Абдуловтынъ яшав эм согыс йолы акында хабарладылар. Согыс акында ятлавлар окылды, ана акында йырды Дагестан Республикасынынъ ат казанган артисткасы Зульфия Аджигеримова йырлады, «Турналар» биюви коьрсетилди. Яслардынъ кардаш-тувганлары Аталыкты коршалавшылардынъ атларын оьмирлеткени уьшин уйгынлавшыларга уьйкен савбол айттылар. Мемориалдынъ касыннан кеткен окувшылар олар уьшин ян берген аьскершилерди эсине алып турарлар. Аталыкты коршалавшылар Йигитлик ордени мен (оьлгеннен сонъ) савгаланганлар, олар дайымларга бизим юреклерде. Мага, яслардынъ баска ювыкларындай болып, сол куьн авыр эди. Коьпти коьрген эр кисилер де коьзясларын ясырмадылар. Бизге мемориаллык таслардан энъ де ювык инсанларымыз карап туры эдилер. Оларды кушагымызга алмага амал таппай, биз сол куьн, бир де таьвесилмес авырувды оьзимизге алмага суьйгендей болып, бирбиримизди юреклеримизге кысып алдык. Савлай дуныяда тынышлык уьшин ян бергенлер баьтирлерге – дайымлык эс. Баьтирлик – ол тек йигерлик тувыл, ол уьйкен аьрекет, каты нызамлык, бойсынмас эрклик эм Аталыкка уллы суьйим. Аьскершидинъ баьтирлиги сенимнинъ, берген антынынъ, алдына салынган борышынынъ белгиси болады. 

Г.Бекмуратова. Суьвретте: шарадан коьринис.