Россия элинде аьр йылдынъ караша айынынъ 10-ншы куьнинде иш ислер органларынынъ куллыкшысынынъ куьни белгиленеди. Аьр кайсы кыянатлыктынъ да алдын шалувдынъ, солар бойынша официаллы эсап беруьвдинъ артында айырым аьдемлер турадылар. Кимлер куьн сайын, саьат сайын тынышлы яшавшылардынъ кавыфсызлыгын саклайдылар, орамларда тынышлыкты тутувга куьш саладылар эм бизим яшавымызга шапкынлык эткенде, биринши болып бу кеспидинъ аьрекетшилери – полиция куллыкшылары келедилер. Караша айынынъ 10-ншы куьни. Бу куьн мынълаган аьдемлерди, кимлер оьз аьрекетин кавыфсызлыкты канагатлавга, гражданлардынъ кызыксынувларын яклавга багыслаганларды, бириктиреди. Бу кеспидинъ иеси йигерли эм йигитликти талаплаган, кеспи усталыгы эм шыдамлы аьдем болмага керек. Россия полициясынынъ тарихининъ тамыры аьвелгиге кетеди, а буьгуьнги кызмет, сол бурынгыдан келген аьдетлерди саклап, ийги оьрленуьвлерди коьрсетеди. Аьлиги заманларда иш ислер органларынынъ куллыкшылары коьплеген борышларды толтырадылар: орамлардагы ямагат йорыкларды тутувдан эм ыхтыяр йорыклардынъ профилактикасыннан алып кыйынлы кыянатлыкларды ашыклавга эм солар ман куьреске дейим…

Россия МВД-сынынъ Ногай районы бойынша иш ислер боьлигинде туьрли подразделениелер ис аьрекет бардырадылар, аьр кайсысынынъ да оьз борышы, толтырмага керек ис планлары да бар… Аьр кайсы ерде де: кала, район, авыл да болсын, МВД тармагында патруль-пост кызмети айырым орынды алады деп айтар эдим, неге десе аьр кайсы кыянатлыкты да олар биринши болып коьредилер: орамларда аьдемлер мен расадылар, кыйынлыкка да олар биринши болып етедилер… Бу подразделениединъ куллыкшысы болув – тек куьш-куватлыгы ягыннан аьзирликти тувыл, кырда юрген аьдемлер мен бир тил табувды, ийги соьйлеп болувды да талаплайды. Ногай район ОМВД-сында ис аьрекетин белсенлик пен яваплы толтырган куллыкшылар аз болмаган эм аьлиги заманларда да бар. Аьр кайсы ис тармакта да исине алал аьдемлер боладылар. Тап сондай болып, полиция куллыкшылары ишинде де ис аьрекетин яны ман суьйгенлер бар, кимлерге куллыгы яшавынынъ эм аьелдинъ бир неше несилининъ ис аьрекети болган. Сондай аьдемлерди билими, санавлы заман ишинде тийисли аьдил карарды алып болувы коьрсетеди. Тармак етекшилери сол аьдемлердинъ йогары квалификациясын эм ис борышларын яваплылык пан толтырувын белгилейдилер. Кеспи байрам. Тамамлар келтириледилер. Тагы да кайтаралап айтаман – аьр кайсы ис орында олтырган, кайдай аты болган болса да, ол биринши болып – аьдем. 

Соьзимди тамамлай келип, бу тармакта ис бардыратаган аьдемлердинъ баьрисин де кеспи куьни мен кутлап, алдыда тек ийгиликлерди йорайман, исинъиз дайым енъил, куьзетлеринъиз кыянатлыксыз оьтсин деймен. Полиция куллыкшылары – иш ислер боьлигининъ уьйкен тармагынынъ бир кишкей кесеги. Олар оьзлерининъ борышларын булай куьнлерде эм байрамларда, сувыкта эм иссиде толтырадылар. Олар урысларда ортакшылык этедилер, кыянатлыклардынъ алдын шалып, гражданлардынъ тынышлыгын коршалайдылар. Сиз меним язган макаламда, аьр бир айырым аьдемнинъ акында белгилегенимде – «ис борышын яваплы толтырады» деген анъламды кайтаралаганымды да сезерсиз эм коьрерсиз, акыйкатлай да, баскалай айтылып болмайды. Баьрисиннен де маьнелиси – гражданлардынъ сыйлавы эм ис йолдаслардынъ оьрмети, сол затларды буйырык бойынша казанып болмайсынъ, сол заман ман бирге исинъе коьре келеди. Меним макаламнынъ келбетлери – аьли ис аьрекетти баслаганлы коьп болмаган аьдемлер, ама иссуьерликлери мен, талабы ман алдыга барадылар, алдыда баьрисине де тек онъайлыкларды сагынаман. Савболынъыз йигерлигинъиз, берген антынъызга алаллыгынъыз эм законды, ыхтыяр йорыкты коршалайтаганынъыз уьшин. 

Галима Курганова, РФ Журналистлер союзынынъ агзасы.