Ногай район орталык больницасынынъ бас врачы Фаризат Янибековна Межитова янъыларда Россия Федерациясынынъ Савлык саклав министерствосынынъ федераллык ведомстволык савгасына тийисли болды. РФ Савлык саклав министри Михаил Мурашко атыннан Сый грамота ога Савлык саклав тармагын оьрлендируьвде етимислери, йогары кеспи усталыгы эм коьпйыллык намыслы иси уьшин тапшырылды. Солай болып Фаризат Межитова Сырт-Кавказ федераллык округында ямагат савгалар бойынша Савлайроссиялык комитетининъ
ваькили, Сырт-Кавказ халклар тыпаклыгынынъ университетининъ ректоры Т.Казакбиевтен «Россия Федерациясынынъ ат казанган медицина куллыкшысы» деген ордени мен савгаланды. Ногай район орталык больницасынынъ бас врачы куьн сайын район яшавшыларын сапатлы медицина коьмеги мен канагатлар уьшин коьп куьш салады. Фаризат Межитовага Сый грамотадынъ тапшырылувы тек онынъ тувыл, савлай Ногай орталык больницасынынъ етимислерин
белгилев болады. Бу оьзгерис районымыздынъ Савлык саклав тармагында оьз исининъ шынты усталары ислейтаганынынъ шайыты болады.
Фаризат Янибековнады биз савга ман кутлаймыз эм куллыгында аьли де йогары етимислерди йораймыз.
Н.Кожаева.
Суьвретте: савгалав мезгили.