Куьз. Бу йыл шагынынъ айырым аьлеметлиги бар болып коьринеди мага: бир ягыннан – ярасык табиат суьвретлери: аьлемет бояклары ман, явын-шашынлары ман, баска ягыннан – сабырлыгы ман… Кыскаша айтканда, бу йыл шагынынъ бир сырлары бардай болып сезиледи. Сондай аьлемет йыл вакытынынъ басында бир йылы йолыгыс болып оьтти. Меним юрегимде бу йолыгыс бир ийги ыз калдырды деп айтпага боламан, сол шарадынъ аьр бир катнасувшысы да мен сезген сезимлерге бийленмей болмагандыр.
Эртенъги шакта, мага бу болаяк оьзгерис акында, аьлиги, Элимизге кыйынлы заманларда пайдалы аьрекетти бардырувшы, оьзининъ артыннан да коьплеген аьдемлерди алып баратаган, согыс спецоперациясы басланганлы бери фронтка аз коьмегин этпеген «Неравнодушные сердца» волонтер куьбининъ белсенли агзасы Зарема Аджигельдиева билдирди эм сонда ортакшылык этпеге шакырды. Бу йолыгыс согыс спецоперациясында ортакшылык этетаган яс ногай кыскаяклы Фарида Нурласанова ман эди. Фаридадынъ акында меним макалам газетамыздынъ бетинде баспаланган.

Сол макаламнан уьзикти келтирип, Фаридадынъ согыс спецоперациясы юретаган япсарлардагы йолын сизинъ эсинъизге салып озайым:
«Согыс спецоперациясы озатаган япсарга киргенлей ок, яшав баасы кайдай экенин анълайсынъ. Куьнле-куьнлик тынышлы яшав баратаган ерде биз сол баалыкты коьрмей де юремиз. Берилген яшав оьз огырына бара береди. Мунда болса, абыт алынганы ман оьмир соьнмеге болады эм нешевдики де соьнип те кетеди. Коьп ерлерде алал дослык ярдамшы болады», – дейди СВО катнасувшысы Фарида Алимхан кызы Нурласанова.
Газета бетинде аьдетли «Аталык алдында», «Элди коршалавшылар» деген рубрикалар астында окувшымыз эр йигитлер акында макалаларды коьрип, олар акында язылганлары ман танысып уьйренген эдилер. Аьли болса, мен сизге наьзик белли, ярасык юзли, коьнъилинде нур яйнаган юка кыскаяклы да Элди коршалавга шыгып, дав майданда алдышылыкта болып болатаганы акында билдирмеге токтастым.
Фарида Ногай районымыздынъ Червленные Буруны авылында тувып-оьскен. Алимхан ман Рысбике Нурласановлардынъ аьелинде тек кыз балалар тербияландылар. Фаридадынъ билдируьвине коьре, ол кайсы ерде де аьелин коршалап болаягын (увыллардан кем болмай) кишкейлей билетаган эди, дурысын айтсак, соьйтип болган ой-ниети…
Фарида согыс спецоперациясынынъ зонасына медицина куллыкшысы болып кирген, бу куьнлерде де дав майданында белсенли аьрекетин бардырады. Ол кесписине коьре – фельдшер. Бакты кайдай туьрли де болады... Фельдшердинъ колында – яшавдынъ соьнееги яде болса, кайтадан янланаягы сенинъ аьрекетинънен себепли… Мен ызгыды сайладым…– дейди Фарида. Элимизге яв шапканда, Фарида эр йигитлер мен бирге Элди коршалавга шыккан. Баьримизге де белгили, согыс озатаган ерлерде яраланганлар да, яшав оьмири уьзилгенлер де коьп болады, медицина куллыкшысы мунда – энъ де маьнели эм керекли. Ол да аьскерши мен бирге юреди, медицина куллыкшысы оьз аьрекетин йигерли, шугыл бардырувдан коьп зат себепли болады. Онынъ тувра борышы – аьдемди оьлимнен куткарув…
Оьзек те, хатын-кызларга дав майданда енъил тувыл, мунда эр киси де кыйынлыкты сезеди. Тоьгерек якта оьлим, коркпайман деп айткан аьдемди коьрген йокпыз. Юрегин ашып соьйлеген аьдем, ушыны ман да оьлимди коьзи мен коьрген, баска явап та берип болмайды. Дав майданда баьрисине де дем беруьвши – ювык аьдемлери. Фарида оьзининъ аявлы анасы, ялгыз аьптеси эм увылы ога куьш беретаганы акында айтады. – Бу куьнги исим мен де тарихке кирермен, увылыма, алдыда – уныкларыма да, оьзимнинъ атайымдай болып, коьрим де боларман, – деген ойын айтып, сенимин билдиреди (хабарласувымыз телефон байланысы аркалы болды)…».
Мине буьгуьнги йолыгыста ол – меним янымда, коьзбе-коьз коьристик эм бир сыпырада олтырып, хабарлаймыз. Ол ога аьрекети бойынша материаллык ярдам эткен «Неравнодушные сердца» волонтер куьбининъ агзаларына оьзининъ разылыгын билдиреди эм куллык этетаган медициналык службасынынъ аьскершилик боьлигининъ етекшиси лейтенант А.Николкин атыннан Разылык хатты тапшырады. Сол хаттынъ иштелигинде «Неравнодушные сердца» куьп агзаларына эм солардынъ ишиннен айырым Крымхан эм Айбике Ялманбетовларга бек ийги соьзлер язылган.
Сол хат мундай соьзлер мен тамамланады:
– Сизинъ белсенли гражданлык позициянъыз, йылувга толган юреклеринъиз эм дайым коьмекке келмеге аьзирлигинъиз – «Халк эм армия бирге» деген, заман ман тергелген соьздинъ аьли де эм тагы да акыйкатлыгын ыспатлайды.
Фарида Алимхан кызынынъ янында олтырып, басыма коьп ойлар келдилер, юрегимди де туьрли сезимлер бийлеп кетти…
Юка шарклы аьдемнинъ уьйкен арслан юреги барын анъладым. Оьзинде аьдиллик касиети де (аьлиги заманда аьдемге зыян келтирмеге болатаган) моллыгын анъламай болмадым. Тек заман, болатаган аьллер бойынша сол касиеттинъ пайдасыннан да бек, зарары коьп экенин оьзим де бек аьруьв билемен… Тек сол яшав…
– Бу яшав йолын оьзим сайладым, ама баслап, кыйналган шакларым да аз болмады. Алдынъда сага карап турган эм сенинъ абытынънан, эткен исинънен аьдем яшавы себепли экенин коьресинъ, ама сенинъ де куьшинъ етпейтаган ерлер де боладылар. Давда соны бек коьп коьресинъ. Сага яраланган аьдемлер дав майданда аз тувыл экенин билдиредилер, ама алдынъа оларды еткергенше, заман керек болады, бир ерлерде етпейди, оьмирлери уьзиледи. Карап турув да, аьдемнинъ навасын да, ишки сезимлерин де козгайды. Болады ерлер сага сондай да разы болып калган аьскершилердинъ айтылган ийги соьзлери сени тагы, тагы йигитликке тартады… Энъ де ийги савга меним ис аьрекетим бойынша – сакланган, куткарылган яшав оьмири.
Хабарласувымыз бойынша «дав майданда ногай миллетли аьдемлер мен расканынъ болдыма», деген соравды бермей болмадым. Фарида, бу соравды куьтип тургандай болып, коьзине нур энип «болды», деп яваплады.
– Бир куьн таза ава ман тыныс алайым, куьн коьзин коьрейим деп, манъгазыдан кырга шыктым. Мага етекшим янасып, миллетимди сорайды, меним авызымнан ногай экенимди эситип, ювыкта меним ногайым бар экенин билдирди. Шакырувы «Хан» болган йигит мага янасады, бир-биримизди биринши кере коьрип турган болсак та, мынъ йыллап таныйтагандай болып, суьйиндик. Ол Ногай районымнынъ Кумлы авылыннан Арслан деген эр киси эди. Хабарласувымыз бек йылы эди, ногай тилимизде хабарладык…
Бу куьнги йолыгыс – «Неравнодушные сердца» волонтер куьбининъ (аьр кайсы авылдан да бу куьптинъ агзалары бар эдилер) аьрекетшилери мен уйгынланган Фарида Нурласанова ман йолыгыс бек аьруьв болып оьтти, мунда олтырган аьр бир аьдем оьз ойы ман, ийги йоравлары ман боьлистилер. Айтып озайым, бу куьптинъ сырасындагы аьдемлердинъ аьр бириси согыс спецоперациясы ман аян таныс болады – биревдинъ увылы, баскадынъ йиени, уныгы, аданасы, кардашы сонда ортакшылык этеди. Солай болганда, бу аьдемлер СВО зонасында болатаган аьллерди «биринши авыздан» эситедилер.
Фарида Алимхан кызы согыс спецоперация оьтетаган ерде оьз наьсибин де тапкан. Онынъ сайлаган ян косагы да – СВО катнасувшысы, ол да Элдинъ тынышлыгы уьшин куьресетаган инсан болады. Мен бу куьнги йолыгыста болганыма бек суьйиндим, мени шакырган Заремага оьз разылыгымды да билдиремен. Дав майдандагы юрген баьри ясларымызга да ден савлыкты, сав-эсен уьйлерине кайтканды йорайман. Фаридага болса, хатын наьсибин, этетаган ис аьрекетинде уьстинликлерди, тоьбемизде тынышлы таза авады сагынаман.
Г.Курганова, РФ Журналистлер союзынынъ агзасы.
Суьвретлерде: йолыгыс шагында.