Бу йыл Элимиз Уллы Енъуьвдинъ 80 йыллык мерекесин кенъ белгилейди. Согыс аьр кимнинъ бактысында да терен ызды калдырды. Миллионлаган аьдемлердинъ бактыларын, аьеллерин, яшавларын бузды. Ол уьйкен куьш пен казанган Уллы Енъуьвдинъ тарихи. Совет аьдемлерининъ йигитлиги – ол уьйкен баьтирликтинъ уьлгиси. Аьвлетлеримиз, уныкларымыз тийисли уьлгиде оьссин деп, биз сол тарих акында оларга хабарламага борышлымыз. Караногай районыннан согыс йылларында фронтка савлайы 2500 аьдем кеткен, сонынъ ишинде тек кишкей Кумлы авылыннан 300-ден артык йолланганлар. Ердеслеримиздинъ коьплери Аталыгымызды коршалавда, дав майданларда янларын курман эттилер, биревлери сес-селемсиз де йок болганлар. Давдан аман-эсен омыравларына туьрли дережели савгаларын илип кайтканларды тувган шоьли хош коьрип алды. Сол йигитлердинъ арасында Кумлы авылыннан Мутаир Киреевич Кутлакаев те бар эди. Ердесимиз эгинши аьелинде 1923-нши йыл тувган. Аьелде тунъгыш яс атасына атларды карамага ярдамласып оьскен. Сол себептен, ердесимизде атларга суьйими яслайын сезилди эм ол телбегиди берк ыслап, ат уьстинде оьзин усташа тутып яслайын уьйренди. Согыс басланганда, ердесимиз фронтка кетпеге бек ымтылса да, оны колхозда калдырдылар. Давга ол тек 1942-нши йыл йолланды эм атлылар аьскерине туьскенине бек суьйинген. 1943-нши йыл авыр урыслардынъ бирисинде яраланады, госпитальде эмленген сонъ, суьйикли аты уьстинде тагы да явга карсы атланады.
Согыстан сонъ тынышлы яшавын курувда эм бузылган хозяйстводы аякка тургызувда оьз косымын этип келди. Колхозда коьп йыллар бойы йылкышы болып аьрекетлеген.
Ветераннынъ уьйкен аьелинде тогыз аьвлетлери оьсип, аьр кайсысы да яшавдагы йолларын тапканлар. Йылкышы атты усташа айдавы ман коьплердинъ эсинде сакланган. Экинши дережели Аталык согысынынъ ордени, «Согыс етимислери уьшин» эм сондай баска савгаларынынъ иеси болган Мутаир Киреевичтинъ коьримли йолын онынъ уныгы Заир Кутлакаев те алды. Ол оьз йолдаслары ман сегиз айлар бойы Украина ман межелескен Белгород областиндеги Тишанка поселогында етимисли кызмет кылувы ман атайы ман басланган исин бардырды. 2022-нши йылдынъ караша айында срочная служба аьскершиси Заир оьз алдына салынган борышын яваплы эм сапатлы толтырганы уьшин боьлик етекшилеви атыннан «Согыс спецоперация катнасувшысына» деген медалине тийисли этилген.
Аьдем оны эслеринде саклаган шаклы яшайды, дейдилер халкта. Элимизди коршалаган баьтирлеримизди дайым эсимизде саклайык. Сол заман Аталыгымыздынъ шынты увылы Мутаир Кутлакаевтей йигитлеримиздинъ атлары яс аркадынъ, ердеслеримиздинъ эслеринде дайымга яшаягына соьз йок.
Гульмира Нурдинова.
Суьвретте: Мутаир Кутлакаев.