Аьр бир мектебте баскаларга коьрим болатаган, оьз йолдасларын ийги окымага даьвлендиретаган окувшылар бар. Солардынъ бириси – Ногай районынынъ Терекли-Мектеб авылынынъ Кадрия атындагы мектебининъ выпускниги Милана Абдулмусаурова. Ол биология сабагыннан 96, химия сабагыннан – 97 балл алган сынавларда. Милана – тек йогары белгилерге окыйтаган окувшы. Онынъ билимге ымтылысы, оьз мыратларына етисуьвде катылыгы, ийнатлыгы оьзине айырым эс каратады. Ийги окувшы – ол тек йогары белгилер тувыл. Мектебте окыган йылларда Милана Абдулмусаурова оьзининъ куллыксуьерлигин коьрсетти. Кыздынъ янъылыкларды билмеге ымтылысы уьйкен етимислерге аькелди.
Тек янъыларда мектеблер выпускниклери ызгы занъ байрамында катнаскан эдилер. Артта кыйынлы сынавлар. Янъыларда Махачкала каласында ЕГЭ сынавларда ийги коьрсетуьвлер берген выпускниклерди савгалав шарасы оьтти. Ийги деген окувшылар ман Дагестан Республикасынынъ Аькимбасынынъ куллыгын юритуьвши Федор Щукин йолыгысты.
– Аьр бир выпускник Дагестанга керек экенин билмеге тийисли. Биз яслар оьрленсин деп янъы
лабораториялар ашаякпыз, мектеблер кураякпыз, янъы ис орынлар туьзеекпиз. Сыйлы выпускниклер! Сизинъ уьстинликлер – савлай республикадынъ оьктемлиги. Кыйынлыклардан коркпанъыз,
алдынъызга йогары мыратлар салынъыз эм эсинъизде сакланъыз: Дагестанда сизди аьр заман куьтедилер, – деди оьз соьйлевинде регионнынъ басшысы.
Дагестан Республикасынынъ Оькиметининъ председатели Магомед Рамазанов 28 окувшыларга 100 мынъ маьнетке сертификатларды тапшырды.
Олар ЕГЭ сынавларда эки эм коьп сабаклардан 95-99 баллар алганлар. Солардынъ ишинде – «Окувда айырым уьстинликлери уьшин» I дережели медалининъ эм йогары белгилер мен аттестаттынъ иеси Милана Абдулмусаурова.
Биз Милана ман оьктемсиймиз. Ога алдыда коьп уьстинликлер эм бийикликлер сагынамыз.
Баьри мыратлары да толсын.
Гульфира Бекмуратова.
Суьвретте: савгалав мезгили.