Астрахань каласынынъ Ленинский районынынъ Кири-Кили авылында кала администрациясынынъ «Эдил палитрасы» деген маданият-социаллык проекти бойынша «Эдиге» деген ногай маданияты бойынша яслар орталыгынынъ эм «Радуга» компаниядынъ етекшилеви мен Авыл куьни кенъ байрамшыланды.

Байрам оьткен стадион еринде спорт-ойын майданлары, батутлар, шенъилшеклер, ойын аттракционлар орынласкан балалар муьйиси де аьрекет эттилер.

Байрамда яшавшыларды кутламага деп кала администрациясынынъ ваькиллери, областьтинъ муниципаллык районларыннан миллет яратувшылык коллетивлери келген эдилер.

Авыл яшавшыларын байрам ман «Эдиге» деген ногай маданиятынынъ яслар орталыгыгынынъ председатели Эльдар Идрисов кутлады. Ол Кири-Кили авыл яшавшыларына тынышлыкты, яхшылыкларды, оьрленуьвди эм онъайлыкты йорады. - Авыл яшавшылары дайым бир бири мен татымлыкта, тил бирликте яшасынлар,-дегенди йорады ол. Оннан сонъ Дагестан халклар ямагатлыгынынъ председатели Али Шарапудинов, «Азербайджан» миллет маданиятынынъ председатели В.Нурадинов, Астрахань каласынынъ Ленинский районынынъ администрациясынынъ аькимбасынынъ орынбасары Е.Ширкина кутлав соьзлерин айтып кеттилер.

Авыл куьнининъ байрамында оьз уьлисин косканларды, баска болып, бу йыл ишинде янъы бала тувган аьеллерин, авылдынъ яшавында белсенли катнасувшыларын, туьрли тармакларынынъ ветеранларын, аьрекетшилерин кутладылар.

Мунда Астрахань областининъ туьрли муьйислериннен келген яратувшылык коллективлери мен оьнерли йырланган ногай, казак, татар, орыс йырларын тынъладылар. Концерт программасында терроризм курманлыкларынынъ эстелигине багысланган яратувшылык номери де коьрсетилди. Амалламадынъ барысында йогарга ак коьгершинлерин де йибердилер. Байрамда «Табан тирес», аркан тартув, ок атув спорт ярыслары да оьттилер. Баьри енъуьвшилер де дипломларга эм эстеликли савгаларына тийисли болдылар.

Кири-Кили авыл куьни ярык, завыклы, йылы аьлде оьтти. Авыл яшавышылары аьр куьнлик ислериннен айырылып, шынтылайын тыншайдылар

Байрамды яслар уьшин биювлер тамамлады.

Астрахань областинде

Янъыларда биз карагаш-ногайларында конакта болдык. Растопуловка авылында «Дослык» ансамбли мен коьристик. Фазиря Байдулла кызы Сунчалиева кобызда ойнап, Эльвира Даут кызы Хасанова эм Хамиза Байдулла кызы Салычева йыр йырладылар. Зунфира Мурзалиева кабалда (барабанда) ойнайды.

Сонъ биз карагаш-ногайы Раиса Джанибек кызы Альмухамедовадынъ уьйинде конакта болдык. Абайдынъ боьлмеси бурынгы муьлкке толы эди. Тамга илинген суьвретлер бизди бир мезгилге 50 йылдынъ аргы ягына таслайды. Сол суьвретлерде ногай халкынынъ яслыгы, дав замандагы яшавы коьрсетилген эдилер. Раиса-абайга 81 яс. Сондай эсли аьдем болса да, ол ястыклар уьстине мундирлер тигеди. Мундир - ол доьрткил оьрнеклер мен тигилген ястыклар, тоьсеклер боладылар. Раиса-абай куьевге шыкканда, басына байлаган тастарын, ога анасы кийитлеп салган тоьсеклерди де коьрсетип сукландыртты. Раиса-абайдынъ айткан хабарларында биз узын йырлар, орам йырлар акында да коьп затлар билдик.
Раиса- абайдынъ уьйине онынъ аданасы Рафик Шугай увылы Суюнов келди. Ол бизге Растопуловка авылы акында йырды йырлады.
Караногайдан телевидение келгени акында эситип, 90 ясындагы Джиянгазиев Муса-атай да келип, бурынгы йырды йырлап эситтирди.
Оькинишке, телевидениеге туьскеннен сонъ, Муса-атай экинши куьн ян берди. (Яткан еринъиз ярык эм еннетли болсын, Муса-атай).
«Дослык» деген ансамблининъ биринши етекшиси Базира Акманбетова ман да растык. Ол бизге «Шелебе» деген йырды усташа йырлады. Джанай авылына бараятырганда, биз «Ак тоьбе» йылгадынъ касында токтадык. Коьпирден алыста аьвелгиде мырзаларымыз коьмилген тоьбелер коьриндилер. Олар уьш тоьбелер боладылар.