ДР Миллет политика эм дин ислери бойынша министерствосы Дагестан Республикасында терроризмге карсы каратылган маьнели проектлерин яшавга шыгарув ниет пен ислейтаган муниципаллык районларынынъ ямагат палаталарынынъ коьтергишлеви мен конкурс уйгынлаган. Ярыста «Ногайский район» МР администрациясынынъ Ямагат палатасы «Яслык» орталыгы ман биргелесте ортакшылык этти эм енъуьвшилер сырасына кирди. Конкурс Дагестан Республикасынынъ «Терроризм идеологиясына карсы турув Комплексли программасы ман» байланыста озгарылды.

Шарадынъ бас мырады – республикадынъ муниципаллык районларынынъ эм калаларынынъ ямагат палаталарын коьтергишлер, Дагестан Республикасынынъ ийги атын шыгарув, бирликти эм миллетлер ара дослыкты берклендируьв.
Конкурс енъуьвшисине 90000 маьнет акшасына сертификат тапшырылган.
– Бу енъуьв баьримизге де суьйинишли, ол бизди келеекте де уьстинликлерге даьвлендиреди. Бу акшага яслар «Яслык» орталыгы «Дени сав яслар – Россиядынъ келеектегиси» деген терроризмнинъ идеологиясына карсы яслар форумын озгармага ниетленеди. Мен миллет политика эм дин ислери бойынша министерствосынынъ етекшилевине коьтергишлев эм тар байланыс уьшин разылык айтаман, – дейди «Ногайский район» МР администрациясынынъ Ямагат палатасынынъ председатели, Дагестан Республикасынынъ ат казанган насихатшысы Эльмурза Саитов.
Енъуьвшилерди баргы ман кутлап, аьли де коьп уьстинликлер йораймыз.
Г.Бекмуратова.
Суьвретте: баргы тапшырув мезгили.