Бизим элимизге кайдай кыйынлыклар туьссе де, ол аьр дайым явга явап берип болган. Аьлиги заманда да, Украина еринде нацистлердинъ кутырувына карамастан, бизим яслар йигитлерше олар ман согысадылар, оларды бизим япсарлардан армаган кувадылар.
– Россия явга явап берип болады, неге десе биз – бир уьйкен эм татым халк. Биз оьзимиздинъ куьшимизге, оьзимизге сенемиз. Бизим артымызда – акыйкатлык, – деп кутарды оьзининъ РФ Федераллык Йыйынына каратылган Язбасын Россия Президенти Владимир Путин. Сол соьзлерге баьри аьдемлер де макул болаягына шекленмеймиз. СВО сырасында куллык этип турган ясларымызды ата-аналары, элимиздинъ баьри яшавшылары да коьтергишлейдилер.
Мурзабек Даутов согыс спецоперациясына Новый Уренгой каласыннан кеткен, мунда ол ызгы заманда яшайтаган эм ислейтаган эди. Асылы ман яс бизим Ногай районыннан. Алибек эм Саният Даутовлар Терекли-Мектеб авылында яшаганлар, бу авылда Мурзабек тувган, балалар бавына юрген.
– 2005-нши йыл Мурзабек Куьнбатар авыл орта мектебине 1-нши класска барды. Онынъ биринши окытувшысы Марие Исаевна Даутова эди. Окув йылларында ол суьйикли Касират-абасында турды. Коьп ийги затларга уьйретти Мурзабекти абасы, онынъ аркасы ман увылымыз оьз эткен ислерине яваплылык пан карап уьйренди. Ол бала заманнан алып танъ, сезгир болып оьсти. Мурзабек досларына алал дос болып, ясуьйкенлерге сый этип, кишкейлерди коршалап юреди. Мектебте ийги окыйтаган баьри шараларда катнасатаган окувшы эди. Уьйкен классларда оларды Альбина Сраждиновна Махмудова етекшиледи. Мен оьзимнинъ увылымнынъ уьстинликлери мен оьктемсийтаган эдим, – деп хабарлайды Мурзабектинъ анасы.
2010-ншы йылда Мурзабекти ата-анасы Новый Уренгой каласына аькеттилер, мунда ол Газпромнынъ техникумына туьсти. Студент йылларында да яс техникумнынъ ямагат яшавында катнасатаган эди, бокс бойынша секцияга юретаган эди. Аьскер сырасында болган заман Мурзабекке бек маьнели эди. Сол йыллар кеделерде шынты эр кисилер касиетлерин кеплейдилер. Сол касиетлерди ол яшав бойынша кулланадылар. Мурзабек Нижний Тагилда ракетный аьскерлер боьлигинде куллык этти. Сонъ кеспи бойынша иследи, окувын Тюмень патшалык университетинде бардырды.
Увылын мобилизация бойынша шакырганда, кашан да, ата-анасы тынышсызландылар. Айлак яс, ога кыйынлы болар деп ойладылар. Болса да, сол заманда да, аьли де Мурзабектинъ ата-анасы увылы ман оьктемсийдилер.
– Биз увылымыз бан оьктем. Ол аьли де яс, медальлери, орденлери йок болса да, мага да, атасына да ол – баьтир, неге десе ол Аталыкты коршалайды, – деп айтады Саният Даутова.
«Йолды юрген алар». Бу соьзлерди Мурзабек Даутов шакырув этип алып койыпты. Буьгуьн ол оьз мырадына абытын каты басып барады – явды енъмеге. Сол йолында аьскершиге шынты йолдаслар карсы келсин, неге десе олар бизим баьтирлер, бизим коршалавшылар.
Сага меним баьри йылы соьзлерим,
Тек сен меним яшавымнынъ
маьнеси.
Кеше-куьндиз коьзяс толган
коьзлерим
Сени куьтип, савкатлайды
саьвлесин.
Соьйтип язады увылына Саният Махмудова. Соьйтип баьри аналар да СВО сырасында явды согып турган увылларына язадылар. А биз олар ман оьктемсиймиз, бизим ясларымыз бан, кимнинъ баьтирлиги дуныяда энъ таза сезим – Аталыкка суьйимге толган.
Г.Абдулакимова
Суьвретте: М.Даутов.
