Ногай районымызда, Россия куьни белгиленеектен алдын, Ногай районымызда оьзгерисли шара – янъы волейбол майданынынъ ашылувына багысланып оьтти. Бу Ногай районымыздынъ яшавшыларына байрам алдында ийги савга болды. Сол шарада ДР авыл хозяйство министерствосындагы авыл япсарлары бойынша боьлик етекшиси Пайзулла Пайзуллаев, Ногай район аькимбасы Джамалутдин Эсиргепов эм онынъ орынбасарлары, спорт ветеранлары, авылдынъ яс несили, яшавшылары ортакшылык эттилер.
Шарады бек ярасык биюв композициясы ман «Карлыгаш» балалар ансамбли ашты.
Шарадынъ барысында Россия элининъ уллылыгына багысланган йырлар да йырландылар. Спорт ветеранлары Сталинбек Муллаев, Алимхан Кокоев, Рустем Гапаров, Мурат Шадиев Ногай район аькимбасынынъ колыннан Сый грамоталар алдылар. Ол аьдемлер Ногай районымызда спорттынъ оьрленуьвине аз куьшлерин салмаганлар, бу куьнлерде олардынъ салган сокпагы коьплерге уьйкен йолга айланган…
Бу куьнги шарага йыйылганлар Ногай район етекшисининъ, республикадынъ власть органларынынъ ваькилининъ кутлав соьзлериннен баска болып, авыл аькимбасы Марат Кулунчаков, Ногай район аькимбасынынъ етекшиси Мурат Шадиевтинъ эм спорт ветеранлары Сталинбек Муллаевтинъ, Рустем Гапаровтынъ да насихат йоравларын эм мундай янъы майданлардынъ ашылувы яслар арасында спортты кенъ таралтувга коьп амаллар беретаганын белгиледилер…
Янъы спорт майданга кируьв уьшин кызыл лентады кесуьв ыхтыяры Пайзулла Пайзуллаевке, Джамалутдин Эсиргеповка эм Сталинбек Муллаевке берилди. Янъы майданга биринши болып балалар кирдилер: биюв, спорт ярыс – волейбол ойыны ман аьвлигуьвшилер, суьювшилер арасында куьш сынав басланды…
Сол ойнавшылардынъ юзлерине караганда, бу майдан бир де бос турмас деген ой да келди.
Бу куьн Ногай район еринде, Россия куьнине багысланган байрам яман болмады.
Г.Сагиндикова.
Суьвретте: шарадан коьринис.