Календарь бойынша кырк кийик айынынъ 3-нши куьни эстеликли куьн деп саналады. Бу куьн окув учреждениелеринде боьтен де кенъ белгиленеди, эм аьр бир окувшы бу куьннинъ тарихин де биледи.
2004-нши йыл. Беслан. Мектеб уьстинде кара булыт капланган куьн, яс оьмирлер кыскарды, атлары калды мермер таслы эстеликлерде…
Ога дейим де, яман тат болып, яшавга кирген терроризм деген соьздинъ кулакка шалынувы эсти састырды…
22 йыл. Сол шаклы йыллар артта мектебтинъ эсигин биринши кере абыткылаган, ама артына кери тирилей шыкпаганлардынъ бактылары уьзилмеген болса, бу куьн олар оьзлерининъ балаларын биринши класска етип аькелмеге де болаяк эдилер, оькинишке, сондай кыйынлы оьзгеристи Беслан каласынынъ яшавшылары басларыннан оьткердилер.
Сол куьнге багысланган линейка Кадрия атындагы мектебинде озгарылды. Линейкады Альфия Мурзали кызы Терекбаева ашты эм юритти. Ол аьдетке кирген шарады коьп йыллар артта болган оьзгеристинъ тарихи мен окувшыларды таныстырувдан баслады, 4-нши класс окувшылары Шамиль Кокешов эм Дамир Сулейманов тема бойынша ятлавлар окыдылар.
Шара барысында оьз соьзин мектеб етекшисининъ исин толтырувшы Зульфия Кидирниязова да айтып кетти.
Болмасын сондай оьзгерислер ер юзинде, яшасын балалар тынышлы аспан астында. Линейка Россия Федерациясынынъ гимни шалынувдан басланды.
22 йыл артта Беслан каласында ян бергенлердинъ эстелигине бир такыйка уьндемей окувшылар ман окытувшылар турдылар.
Эс. Сакланады дайым да. Неше йыллар оьтсе де, мутпаяк сол теракт бойынша яшавлары курман болган балаларды, окытувшылар ман ыхтыяр саклавшы органлардынъ куллыкшыларын эли эм ювык аьдемлери…
Эс болган шаклы, олар бизим юреклерде яшайдылар…
Г.Курганова.
Суьвретте: линейка озган шагында.