Ногай халкымыз савлай дуныя бойынша шашырап яшайды. Кайсы ерде турса да, оьз халкынынъ тарихи мен кызыксынады ногай. Соьйтип, янъыларда ХМАО еринде Сургут каласында исламовед, бизим ердесимиз, МГИМО Халклар ара излестируьвлер институтынынъ алдышы илми куллыкшысы, тарих
илмилер кандидаты Ахмет Амин увылы Ярлыкапов пан йолыгыс озды. Бу округка аьлимнинъ барувынынъ себеби – Сыртта яшайтаган ногайларды эм Арктикада эм Приполярьеде аьлиги ислам динининъ аьлин уьйренуьв эм тергев. Ахмет Амин увылы имамлар эм дин аьрекетшилери мен йолыгысты, Белый Яр авылында ХМАО муфтийининъ коьмекшиси, дагестанлы Ибрагим Хайбулаев пен коьристи. Сургут каласында ногай халкынынъ савлай
дуныяга белгили аьлимин, излестируьвшисин Ногайлар яслар союзы хош алды. Олар Ахмет Ярлыкапов пан йолыгыс уйгынладылар.
Коьп соравларга яваплады аьлим. Ол Карашай-Шеркеш, Кабарты-Балкария, Дагестан республикаларында озгаратаган излестируьв ислери акында толысынша хабарлады. Ногай халкымыздынъ маьселелери акында, кайдай байракты ногайлардыкы деп санамага болатаганын сорадылар. Ахмет
Амин увылы тарих акында айтты, келеекте де излестируьвди бардыргандай тарихшилер керек экенин белгиледи. Байракты халк оьзи йыйылып, сайламага, ойласпага керек – янъы байрак алмага яде аьли кулланатаганлардынъ бирисин калдырмага. Аьлим Сургут каласынынъ музейлеринде болды.
Йолыгыста Сургут каласында яшайтаган ногайлар бар эди, солардынъ ишинде – ямагат аьрекетшиси Радмир Нуралиев, йырлавшы Узаир Найманов. Талаплы музыкант домбрада ойнады. Ахмет Ярлыкаповка Сургут каласынынъ Яслар союзынынъ председатели Беккуват Болатов коьплеген йыллар кайратлы иси, ана тилин саклавга салдарлы уьлис косканы, Россиядынъ эм Кавказдынъ баска халклары ман байланысларды беркитип турганы уьшин Разылык хат тапшырды (суьвретте).
Яс несил уьшин бу йолыгыс бизим халкымыздынъ тарихи акында билимлерин оьстирмеге амал болды. Тарих пен, маданият пан кызыксынатаганлар сол куьн савлай дуныяга белгили атлы аьлимнинъ исине катыстылар. Несиллер ара диалог – бизим халкымыздынъ анъ байлыгын саклавда эм ясларга
коьшируьвде маьнели абыт. Сондай йолыгыслар коьп болсын. Йыйылганлар аьлимге сондай ийги лекция уьшин савбол айтып, келеекте байланыслар уьзилмес уьшин баьри амаллар да алынар деп белгиледилер.
Г.Бекмуратова,
Россия Журналистлер союзынынъ агзасы.