Куьздинъ йылувын аямай савкатлаган куьнлерининъ бирисинде Ногай районында коьптен бери каралган, суьйинишли оьзгерислер болдылар – капиталлык ярастырувдан сонъ «Юлдыз» эм «Айсылу» балалар бавлары оьз капыларын кенъ аштылар. Меканлар «Комплексное развитие сельских территорий» Патшалык программасынынъ «Современный облик сельских территорий» Федераллык проекти бойынша коьрклендилер. Бу бавлар тек оьз ярасыклыгы ман коьзлерди кувандырып калмайды, мунда саьбийлерге баьри онъайлы аьллер туьзилген. Юлдыз балалар бавынынъ ис коллективи мен бирге куванышын боьлиспеге шатлыклы ашылувга багысланган шарага Ногай район эм Терекли-Мектеб авыл администрациялар, билимлендируьв боьлигининъ ваькиллери, тербияланувшылардынъ ата-аналары, тийисли тыншаювдагылар келдилер. Аьдет бойынша шара Россия Федерациясынынъ гимни мен ашылды. Россия байрагын коьтермеге ыхтыяр согыс спецоперация катнасувшыларынынъ балалары Медина Култаева ман Айсель Тангатаровага берилди. Бириншилей бу маьнели оьзгерис пен йыйылганларды Ногай район администрация аькимбасы Джамалутдин Эсиргепов кутлады. – Бу куьнги оьзгерис – савлай районымыз уьшин бек маьнели. Янъы социаллык меканлар курылувы – ол келеектегиге баалы косым. Балалар бавынынъ ашылувы ол тек курылыс куллыклардынъ тамамы болып калмайды, ол авылдынъ яшавынынъ янъы бети. Оьзек те, аьли де коьп куллыклар – алдыда, биз бирге соны оьтермиз, толтырармыз. Бек суьйинишли янъы билимлендируьв учреждениелер ашылувынынъ шайыты болув эм энъ де баалы – балаларымыз уьшин бирге онъайлы аьллер туьзетаганымызды сезуьв, – деди Джамалутдин Эсиргепов оьз кутлав соьзинде. Йыйылганлар алдына шыгып сыйлы конак Алибек Мурзаев, ата-аналар атыннан Эльмира Савкатова соьйледилер. Алибек Мурзаев бу тыныш болмаган, СВО озып турган заманларда социаллык соравларды да шешпеге енъил тувыл, ама кыйынлыкларга карамастан, элимиздинъ етекшилеви сол соравларды уьстинликли шешетаганын белгиледи.

 Балалар бавынынъ етекшиси Солтанат Телемишева курылыс ислерин яшавга шыгарувда себеплигин тийгисткен район етекшиси Джамалутдин Эсиргеповка, солай ок район администрациясынынъ финанслар боьлигининъ етекшиси Арслан Кусегеновка оьз разылыгын билдирди. Тербияланувшылардынъ яттан ятлавлар айтып катнасувы, шарага аьлемет йылувлык косты. Шарадынъ оьзеги – кызыл лентады кесуьв, сол сыйлы ыхтыяр Джамалутдин Эсиргеповка, Алибек Мурзаевке, Солтанат Телемишевага берилди. Конаклар балалар бавынынъ ярастырылган, ярык, аьлиги заманга келисли куьп боьлмелерине кирип ийгиди коьрдилер. Дайым балалар бавын йылувлык, каьр шегуьв, суьйим аьллери бийлесин, аьр бир янъы куьн балаларга билимлер, уьстинликлер аькелсин.

 Нурият Кожаева. 

 Суьвретте: шатлыклы ашылувдан коьринис.