«Кызыл байрак», «Шоьллик маягы», «Шоьл тавысы»– туьрли йылларда баскалай аталып, тувган тилинде шыгатаган газетамыз 95 йылдан бери аьр бир ногай аьелге еткериледи. Газета кайсы йылларда да, тынышта да, кыйында да халк пан бирге болган. Авыр согыс йылларында да газета аьрекетин коймаган, онынъ куллыкшылары кыйынлыкларга карамастан оьз ислерин намыслы толтырганлар. Оннан сонъгы йылларда да эм аьли де газетамыздынъ иштелигин ийгилендируьв, сапатын коьтерер бойынша токтавсыз куллык юритиледи. Газетамыздынъ кезекли номерлерин аьр заманда да, (оннан баска билдируьв булаклары болмаган эм аьлиги билдируьв булаклары эркин заманда да) шыдамсыз куьткен аьдемлер болган, эм аьли де олардынъ саны аз тувыл. «Шоьл тавысы» Ногай район яшавшылары уьшин тек билдируьв булагы болып калмайды, ол – куьндегилик яшавдынъ айырылгысыз кезеги. Айтып озайык, газетамызды тек тувган районымызда тувыл, элимиздинъ туьрли калаларында яшаган халкымыздынъ ваькиллери де окыйдылар. Дагестан Республикасында ногай тилинде шыгатаган сынъар газета болып, «Шоьл тавысы» оьз тоьгерегинде киши тувган ерининъ янъылыклары, ердеслеримиздинъ тарихлери эм согыс спецоперация катнасувшыларынынъ бактылары ман кызыксынганларды биргелестиреди. Газета халкымыздынъ бай тарихи, адабияты, маданияты, санияты ман яшавшыларды коьп йыллардан бери таныстырып келеди. Муннан бизим яслар ата-бабаларымыздынъ яшавы, аьдетлери, баска халклар ман катнаслары акында биледилер. (Газета бетлеринде халкымыздынъ белгили, тувган ерининъ оьрленуьвине, ясларды тербиялавга уьйкен уьлис коскан аьдемлер, районымызда эм республикамызда болатаган маьнели оьзгерислер, яшав агымы ман туватаган туьрли маьселелер эм оларды шешуьв йоллары акында макалалар баспаланады. 95 йыл узагына «Газета – халк уьшин» деген шакырув астында куллык этиледи. ) Бизди бек оьктемситеди газетамызды алатаганлар сырасында онынъ биринши аьриптен ызгысына дейим окыйтаганлар. Ондайлар, шынтылайын да, йок тувыл. Оны шайытлайды бизим газета окувшылары. Олар – ногай халкым тоьселип конган туьрли ерлерден, туьрли кеспили. Аьр дайым да газетага язылув исин коьтергишлейдилер, бизи мен оьз ойлары эм йолыккан маьселелери мен боьлискенлер де бар. Газетага язылув исининъ уьстинликли оьтуьви районымыздынъ яшавшыларынынъ коьтергишлеви аркалы болады. План Ногай районынынъ администрациясынынъ аькимбасы Джамалутдин Эсиргеповтынъ, муниципаллык организациялар эм учреждениелер етекшилерининъ белсенли коьмеги аркалы толады. Маьнели болады уьйкен несилдинъ колтыклавы, олардынъ газета окувга алаллыгы редакция коллективин даьвлендиреди. Уьйкен разылыкты билдиремиз «Казыят» саваплык фондына, олар аьр дайым да колайсыз яшайтаган аьеллерге спонсорлык ярдамын этедилер, эм сол коьтергишлев аркалы бу йылдынъ экинши ярым йылында да районымызда яшаган сондай токсан аьел тегин газетады алып окымага амаллы болдылар. Ак юректен савбол айтамыз Алибек Мурзаевке, ол согыс спецоперация катнасувшылары эм ветеранларынынъ 50 аьеллерине газетага язылувды бу ярым йыл уйгынлады. Разылыгымызды билдиремиз язылув исин дайым коьтергишлейтаган аьлим Ахмет Ярлыкаповка, Терекли-Мектеб авыл яшавшысы Руслан Бекмуратовка эм баскаларга. Коьп йыллардан бери бизи мен бирге конъысы Кизляр, Бабаюрт эм Тарумов районларынынъ яшавшылары. Разылык соьзимизди айтамыз Кизляр районынынъ аькимбасы Аким Микировка газетамызга язылув исин коьтергишлегени уьшин. Бу куьнлерде бизим газета, заманга келисли маьселелерди коьтерип эм маьнели оьзгерислер акында халкымызга билдирип, баьри ногайлардынъ да тавысы болып калады. Газетамызга язылатаган аьдемлердинъ саны оьсетаганына биз, оьзек те, суьйинемиз. «Шоьл тавысын» оьзининъ куьндегилик билимлер эм даьвлендируьв булагы этип сайлаган аьр биревге савбол айтамыз, уьстимиздеги йылдынъ экинши ярым йылында да редакция куллыкшылары, алдынгыдай болып, районымыздынъ кызыксынувларын яклап тураяк. Бу куьнлерде биз тувган газетамыздынъ 95-йыллык мерекесин белгилеймиз. Артка карап, биз сизи мен, аявлы окувшылар, бирге оьткен узын йолды коьремиз. Биз билемиз эм ынанамыз, «Шоьл тавысы» келеекте де халкы ман бирге болаягына. Оны яс несиллер тувган тилге суьйимди юректен юрекке, газетады колдан колга коьширип окырлар деген сеним этемиз. 

Нурият Кожаева.