Ногай патшалык халк саз алат-
лар оркестрининъ язгы залында
яс ногай актери, ДГУ-дынъ актер усталыгы факультетининъ выпускниги Юнус Хановтынъ сценарийи эм режиссурасы бойынша эм «Красный ковер» яратувшылык биригуьвининъ демевлиги мен быйыл аьзирленген «Афган: янъы
куьнлердинъ эстелиги» деген художестволык фильми коьрсетилди.
Бу фильмди каравга солай ок районда яшайтаган Афганистан согысынынъ ветеранлары, Ногай район администрациясынынъ, Терекли-Мектеб авыл  администрациясынынъ эм авыл Депутатлар йыйынынынъ, бир неше организациялар эм учреждениелер етекшилери эм
ваькиллери шакыртылдылар.
Бу фильм боевик жанрында
Дагестаннынъ Леваша эм Кара-
будахкент районларынынъ тавларында согылып алынган. Бас рольлерде Юнус Ханов, Алихан Касумов, Магомед Маммаев эм Махачкаладынъ яс актерлары ойнайдылар. Фильмнинъ сюжетине коьре,
афган боевиклерине есирге туь-
скен эки совет аьскершилери бир куьн соннан кашадылар. Олар аьр бир абытында оьзлерин куьткен кавыфлыкларды, кыйынлыклар-
ды, аявсыз ят тавларды эм артыннан кувган явлар ман атысувларды оьтип, авыр яраланса да, бизим
аьскершилерге етедилер. Фильм совет аьскершилерининъ эрлиги, берк дослыгы, берген антына алаллыгы акында хабарлайды.
Фильм кутылган сонъ, Ногай
патшалык оркестрининъ етекшиси, Дагестан саниятынынъ ат казанган
аьрекетшиси Бекмурза Кудайбердиев сценага зал толган каравшылардынъ каты карс кагувлары ман сонынъ яс авторы Юнус Хановты шакырды. Юнус фильм уьстинде оьз йолдаслары ман бирге кайдай
аьллерде эм кайтип ислегени, соны ол тек телефон ман эм 50 мынъ маьнетлик оьз бюджети мен согып алганы акында кызыклы хабарлады.
Яс ердесимизди сондай оьнер
уьстинлиги мен Ногай район
администрациясынынъ аькимбасынынъ орынбасары Мурад Шадиев, Терекли-Мектеб авыл администрациясынынъ аькимбасы Марат Кулунчаков, Россия маданиятынынъ сыйлы куллыкшысы, Дагестан халк артисти Яхъя Кудайбердиев, «Шоьл тавысы» республикалык газетасынынъ бас редакторы Эльмира Кожаева, Ногай район билимлендируьв куллыкшыла-
рынынъ профсоюз комитетининъ председатели, талаплы режиссер Арслан Бакиев, район Афганистан
согысынынъ ветеранлар советининъ председатели Сталинбек Култаев кутладылар.
Бекмурза Кудайбердиев муннан
бир 10 йыллар артта Юнусты ДГУ-дынъ филология факультетиннен актер усталыгынынъ факультетине
коьшируьвде оьз коьмегин эткенин айтты. «Коьресиз, Юнусты актер факультетине коьшируьвимиз босына болмапты, буьгуьн ол бизди оьзининъ оьнери мен суьйин-
дирип туры. Ога оьзимнинъ эм
сизинъ атынъыздан алдыда уьйкен уьстинликлерди йорайман», – деди Бекмурза Кудайбердиев. Арслан Бакиев оьзининъ соьзинде фильм ога эм баьрине да яраганын, сонда тек согыстынъ кыйынлыгы тувыл, солай ок совет
аьскершилерининъ эрлиги, йигитлиги де коьрсетилгенин айырым белгиледи. Онынъ айтувы ман, кино аьзирлев енъил куллык тувыл, 50 мынъ маьнетлик бюджет пен Юнустынъ аьзир эткен бу
фильми – ол уьйкен мактавга тийисли ис.
Мурад Шадиев оьз соьзинде
актер Юнус Хановтынъ шыгар-
ган янъы фильми районымыздынъ
яшавында маьнели оьзгерис болады деп белгиледи. Онынъ айтувы ман, мундай патриотизм негизинде аьзирленген фильмнинъ коьрсетилуьви бир яктан аьлиги заманда
элимиздинъ согыс спецоперациясы аьллеринде яшап турганы ман байланыслы болады. Ол ак юрегиннен
районымыздагы Афганистан согысынынъ ветеранларына разылыгын билдирди эм оларга ден савлык йорады.
Яхъя Кудайбердиев оьз соьзинде бир телефон ман сондай уьйкен фильмди аьзир этуьв – ол аьлиги заманнынъ уьйкен технология анъсатлыкларын коьрсете-
ди деп белгиледи. Ол фильм онълы кепте салынган деп белгиледи. Юнус авылдасымызга эндиги де янъы яратувшылык уьстинликлерди йорады. Соны ман бирге
ол яс актерга оьзининъ бир неше ой-маслагатларын берди, ногайдынъ бай тарихи, аьдетлери, маданияты ман байланыслы янъы оьнер
куллыклар шыгарувды йорады.
Эльмира Кожаева фильм мен
байланыста Юнус Хановтынъ
эткен кыйынына тийисли йогары
белгисин берди. Ол келеекте яс
актерымыз эндиги де ийги филь-
млер мен халкымызды суьйиндирер деген сенимин билдирди эм «Шоьл тавысы» республикалык газетасы атыннан Юнуска Сый
грамотасын тапшырды.
Марат Кулунчаков актерга
авылдынъ администрациясы эм
Депутатлар йыйыны атыннан Разылык хатты тапшырды, ога ийги йоравларын айтты.
Г.Бекмуратова.
Суьвретте: Юнус Хановты кутлав аьсеринде.