Янъыларда Кизляр районынынъ аькимбасы Аким Микиров «Ярастырув-курылыс управление» АО-дынъ Кизлярдагы филиалынынъ директоры Махмуд Гусейнов пан ис йолыгыс озгарды. Шарада район администрациядынъ аькимбасынынъ орынбасары Мурад Багандов ортакшылады. Ис куьнделигинде негизли соравларынынъ бириси – «Дагестанавтодор» ГКУ карыжында туратаган Кизляр районда коьлик йолларын ярастырылувынынъ барысы. Йолыгыста толысынша этилетаган ислердинъ юруьви эм озгарылган ярастырылув ислердинъ оьлшемлери тешкеруьвли каралдылар. Баска болып, йолыгыста Кизляр – Крайновка эм Крайновка – Тушиловка коьлик йоллар участокларын капиталлык ярастырув оьлшеми мен байланыслы соравлары ортага салынып ойласылды. Кенъес барысында келеекте озгарылаяк ислер акында да билдируьвлер этилди. Айтпага, 2027- нши йыл ишинде Кизляр – Крайновка йолынынъ 10 шакырым ери капиталлык ярастырылаяк, а 2027-нши йылдан алып 2028-нши йылга дейим сондай ислер Крайновка – Тушиловка йолынынъ ети шакырым кесегинде де озгарылаяклар. Баска болып, 2027- нши йылда тамамланмага каралатаган, узынлыгы 11,2 шакырым болган, Кизляр – Ясная Поляна коьлик йолында да белсенли куллыклар юритиледи. Соны ман бирге узынлыгы он бес шакырым болган Крайновка – Старый Терек йолын ярастырувы да етимисли бардырылады. Йолыгысты тамамлай келип, Аким Микиров район авылларына дейим коьликлерге етпеге ийги аьллер туьзилуьв эм кавыфсызлык йол юрисин канагатлав уьшин заманы ман эм сапатлы ярастырув бойынша ислер озгарылувдынъ маьнелигин де белгилеп озды.

 Суьвретте: шарадан коьринис.