Венгрия элининъ Кишкуншаг деген Миллет паркында, Бугац авылынынъ янында тюрк-гунн халкларынынъ курултайы озды. Муны этнофестиваль деп атамага да болаяк эди, ама келгенлер де, венгр- мадьярлар оьзлери де оны курултай деп атаганлар. Курултайда 27 элдинъ байрагы ярасыклы болып, бир ерге йыйналып, елпилдеп турганлар. Уьйкен майданда 142 тюрк термелери курылганлар, 400-ге ювык аьдемлер ат уьстинде шапкылаганлар, 2 мынъга ювык каравшылар да келгенлер. Эки куьн ишинде 40 концерт программалары, коьшпели аьскерлерининъ туьзилисин карав, ат шабыс, аьскер ойынлары эм ок атув ярыслары озгарылганлар. Сондай курултайлар Венгрия элинде эки йылда бир озадылар. Бу коьп эм аьлемет затларды коьрген, дуныядынъ туьрли эллериннен келгенлер – халкларды бирлестируьвши сондай шарады аьзирлеген венгрларга уьйкен разылыкларын билдиргенлер.
![](https://golosstepi.ru/wp-content/themes/etnoholding/img/noimage-min.png)