Янъыларда Россиядынъ Иш ислер министерствосынынъ Кизляр районы бойынша боьлигининъ етекшиси полиция подполковниги Ахмед Магомедов, оьз ыхтыяры ман Россия Федерациядынъ Коршалав министерствосы ман контракт беркитип, согыс спецоперация юрген ерге йолланды. Ол элимиздинъ эм онынъ яшавшыларынынъ кавыфсызлыгын коршалав ниетте оьзин яваплы эм борышлы этип сезип, оьз эрки мен токтасын алган. СВО ерине кетеектен алдын Ахмед Магомедов Кизляр районынынъ аькимбасы Аким Микиров пан йолыгысты. Онынъ барысында, район аькимбасы, офицердинъ коьрсеткен уьлгиси уьйкен сыйга тийисли экенин белгилеп, ога берк ден савлыкты эм уьйине аман-эсен кайтканды йорады. Ахмед Магомедов ис куллыкшыдан, район боьлигин етекшилев аьрекетине дейим сыйлы йолын оьткен. 2023-нши йылдынъ коькек айыннан алып, ол, Россия МВД Кизляр районы бойынша боьлигин етекшилеп, ямагат кавыфсызлыгы эм ыхтыяр бузувлардынъ алдын шалув бойынша соравларына уьйкен эс каратып келди. Ис аьрекети йылларында ол етекшилев эм тезлик пен каьрлев иси бойынша бай сулыбын казанган. Оьзининъ яваплы эм минсиз ис аьрекети уьшин ол «За отвагу», «За доблесть в службе», III дережели «За отличие в службе» савгалары ман белгиленген. Ахмед Набигуллаевич «100 лет Уголовному розыску» деген Россия МВД-сынынъ омырав белгисине де тийисли этилген. Буьгуьнлерде Ахмед Магомедов согыс спецоперация еринде разведкаштурм юритуьв бригадасынынъ боьлигин етекшилеп, Аталыгынынъ кызыксынувларын намыслы коршалавшыларынынъ бириси болады. Суьвретте: йолыгыстан коьринис.