Ер юзинде кайдай кеспи де бар, тек янынъ суьйгенди сайлап бил, сайлап, кеспиди байырлаганнан сонъ, алаллыгынъ ман ислеп те бил. Бар кеспилер, кайсысы акында – ол ша бу инсанга шынтысы ман да келисли эм тийисли, деп айтылатаганлары да. Ногай районымыздынъ А-Х. Джанибеков атындагы мектебинде сондай аьдемлердинъ бириси – Гульминат Хасанбий кызы Янбаева. Ол – эсап эм информатика сабаклары бойынша окытувшы, Патшалык итоговый аттестация бойынша технический специалист, коьп йыллар бойынша ис борышын алаллык пан толтырып келеди. Окытувшылык ис аьрекетине йолды Гульминат Хасанбий кызы оьзи мектебте окыган йылларында салып келди. Ол Ногай районымыздынъ Нариман авылынынъ орта мектебин тек «бес» белгилерге окып битирип, оьзининъ яшавын да тувра илмилер мен байланыстырмага токтасады. Бу куьнлерде сулыплы, билимли окытувшы Дагестан патшалык педагогикалык йогары окув ошагында кесписин байырлаган, ол айтылган окув ошагында окыган йылларында да оьзининъ терен билим алмага уьйкен аваслыгы барын коьрсетип келди. Онынъ педагогикалык ис аьрекети Ногай районымыздынъ Батыр-Мурза авыл мектебинде басланган. Сол йылларда онынъ алдында аьли де юрилмеген сокпаклар аз тувыл эдилер, аьли болса, ол оьзи аьр кайсы яс аьдемге де насихатшы болып болады, онынъ да яшав йолында коьрим алгандай окытувшылары да болган эм аьли де ол маслагатласатаган ясуьйкен окытувшылары бар. Аьлиги заманда онынъ ис сулыбы да, сайлаган кесписи бойынша билими де оьскен, артта 15 йылдан артык– окытувшылык аьрекет, баьрисиннен де баалысы – окувшылардынъ суьйими эм ис йолдаслардынъ сыйлавы. Сыйды болса, аьдем кайтип казанады? Оьзек те, оьзининъ сайлаган исине алаллыгын коьрсетуьви мен. Гульминат заман ман бирге де абытлап келеди, ол тек эсап бойынша токтастырылган формулалар ман алгоритмди уьйретип калмайды, ол оьз окытувшылык процесси бойынша дерислерине янъы билимлендируьв платформаларды эм проектлик аьрекетти киргизип, кыйын сабакларды анълавлы эм тыныш этеди, солай болганда, онынъ беретаган дерислери бек кызыклы да оьтеди. Ол оьзи де куьн сайын билимин теренлетуьв уьстинде ислеп турады. Айтпага, квалификациясын оьстируьв, ОГЭ, ЕГЭ бойынша аьзирленуьв курслары оьтуьв, солай ок заманга келисли цифровой технологиялар бойынша билимин беркитеди. Сол алганлары ога окувшыларды янъы яшав шакырувларына аьзирлемеге куьш те, амал да береди. Мен оьзим де Гульминат Хасанбий кызы Янбаевады аьруьв таныйман деп айтпага да боламан: окытувшы эм кайдай аьдем экенине де «бес» белгиге явап берип болмасам да, «уьш» белгисине берермен деп ойлайман. Ол инсанга бир коьз карасынды таслаганлай ок, онынъ окытувшы кесписин сайлаган эм сол аьрекетти бардыратаганын анъламага болады. Аьдемнинъ турган турысы, караган карасы, юзиндеги сусы коьп зат акында айтады. Окытувшы – баьримиздинъ де эсинде эм ойында (орта ясларындагы несил ваькиллерине, аьлиги яс аьдем атыннан соьйлеп болмайман, олардынъ яшавга карасы да, ойы да бек баска. Оларга, оьпке-багана этпесинлер, «авторитет» деген соьз баскаша анъланылады.) бек куьшли сыйланатаган, ол боьлмеге кирип калса, олтыр деп айтпай турып, олтырмайтаган эдик, онынъ янында коьз коьтермей соьйлейтаган аьдем эди… Гульминатка караганда, мен аьли келтирген нышанларды онда коьремен. Соьйлеген соьзи сабыр болса да, ясырынган катылыгы да бар болып коьринеди. А-Х. Джанибеков атындагы мектебининъ каралдысына кирип, Гульминат Хасанбий кызын коьре калсанъ, ол сени дайым куьлемсиреви мен йолыгар, балалар ман да катнасы бек йылы болып коьринеди. Ол меним оьзимнинъ балаларымды да окыткан окытувшы болады, олардан да окытувшысы акында тек ийги соьзлер эситкенмен. Окытувшыдынъ белсенли ис аьрекети коьплеген Сый грамоталар ман эм разылык хатлар ман белгиленген. Бир неше кере онынъ сапатлы куллыгын Дагестан Республикасынынъ Билимлендируьв министерствосы, Ногай районымыздынъ аькимбасы эм авыл етекшиси савгалаган. Ногай районымыздынъ билимлендируьв тармагынынъ етекшиси Амирхан Зейнадин увылы Межитов та Гульминат Хасанбий кызынынъ ис аьрекетине йогары дережели баады берди. – Гульминат Хасанбий кызы Орталык патшалык сынавлары ийги оьтсин деп, уьйкен куьш салады. Савлай процесс онынъ колында болады деп айтага да боламыз, аьрекеттинъ технический ягы баьри онынъ колында, – дейди Амирхан Зейнадин увылы. Окытувшыдынъ кеспи куьни. Бу куьн биз окытувшыларымызды кутлаймыз, оьзимизди окытканларды эсимизге аламыз. Савлай гуьл байламларын оларга савкатламага разы эдик. Окытувшы, олардынъ беретаган билими баасыз, ак юректен баьри окытувшыларды да, сол санда Гульминат Хасанбий кызы Янбаевады да ак юректен кеспи куьни мен кутлап, алдыда тек ийгиликти, уьстинликлерди, боьтен де разы болып, мектебтен уьйкен йолга шыккан окувшылар саны тек оьсип турганды йорайман.

Галима Курганова. 

 Суьвретте: Г.Янбаева