Янъыларда Кизляр район администрациясында муниципалитет аькимбасы Аким Микиров «СВО Ветеранлар Союзы» Савлайроссиялык ямагат организациясынынъ Дагестан Республикасы бойынша региональлик боьлигининъ ваькиллери мен йолыгысты. Делегация сырасына организация председатели Абдулбасыр Абдулбасыров, онынъ орынбасарлары Магомед Кадиев, Микаил Микаилов эм Шахрутдин Гунашев кирдилер. Йолыгыста солай ок «Кизлярский район» МР Депутатлар йыйынынынъ председатели Эльдар Кадилов эм Кизляр, ЮжноСухокумск калаларынынъ эм Кизляр районынынъ военкомы Рамазан Курамагомедов ортакшылык эттилер. Йолыгыс барысында Абдулбасыр Абдулбасыров Кизляр районы СВО аьскершилерине эм олардынъ аьеллерине дайым да гуманитарлык ярдамын этип туратаганына разылыгын билдирди. Олардынъ уьйкен белсенлик пен юритетаган ак ниетли аьрекетликлери уьшин Аким Микировка, Эльдар Кадиловка эм Рамазан Курамагомедовка организация атыннан Разылыклар тапшырылды. Аким Микиров алдышылыкта патшалыгымыздынъ кызыксынувларын яклайтаган аьскершилерди эм олардынъ аьеллерин колтыклав Кизляр районынынъ етекшилиги уьшин приоритетли борыш болып калатаганын белгиледи.