Расул Гамзатов. Озган ХХ юзйыллыктынъ энъ де атаклы шаирлерининъ бириси. Ол Дагестан эм СССР, Россия адабиятын оьз оьнери мен савлай дуныяга коьтерди. Онынъ яратувшылык исине йогары баа берилген: ол Дагестаннынъ Халк шаири, СССР Патшалык, Ленин баргыларынынъ лауреаты, Социалист Истинъ Баьтири, солай ок коьплеген орденлердинъ, шет эллер савгаларынынъ иеси.
Р.Гамзатовтынъ «Турналар» деген Уллы Аталык согысыннан кайтпаган ердеслеримизге багысланган йыры (анъы композитор Ян Френкельдики) олардынъ баьрисине де тири эстелик болды. Бизим Элимизде сол йырды эситпеген эм билмеген аьдем йок. 1986-ншы йылдан алып сол атаклы йырга, Расул Гамзатовтынъ яратувшылыгына уьйкен сый этип Дагестан еринде «Ак турналар» деген фестиваль беркитилген. Соннан бери аьр йылда да Гамзатовтынъ тувган куьнине сав элимизден эм баска шет эллерден белгили язувшылар, шаирлер, конаклар, республика етекшилери, журналистлер Таркиге келип, шаирдинъ камырына шешекейлер саладылар.
Быйыл республика еринде сондай байрам-фестиваль 40-ншы кере оьткериледи. Сонынъ алдында былтыр Россия Президенти Гамзатовтынъ адабият асабалыгына уьйкен оьрмет этип, онынъ тувган 8-нши сентябрь куьнин солай ок Россия халкларынынъ тиллерининъ куьни деп токтастырган. Ол Гамзатов куьнлерин мукаят та сыйлы этти демеге керекпиз. Буьгуьн бу байрамга республикага элимиздинъ туьрли ерлериннен бек коьп оьнерли аьдемлер, сыйлы конаклар келгенлер. Олардынъ аьр бириси Дагестанга, онынъ коьпмиллетли халкына, уллы шаир Расулдынъ оьлимсиз оьнер асабалыгына, согыс йылларында Элимизди явдан коршалаган йигитлердинъ баьтирлигине бас иедилер.
Сага дайым яным меним авырыган,
Айтсынлар ярлы деп, йок деп куьши.
Эситилмесин ол бийик трибунадан –
Тувган тилим уллы дайым мен уьшин.
Р.Гамзатов. «Тувган тилим».