Дагестан Республикасы бойынша «Аталыкты коршалавшылар» деп аталган Патшалык фондынынъ филиалы согыс спецоперациясынынъ ветеранларына тынышлы яшавга кайтувга эм кеспи тармагында оьз орынын табувга баьри ягыннан да керекли коьмекти этип турады. Ногай районында бу фондтынъ филиалынынъ социаллык координаторы Аскерхан Межитовка янъыларда СВО ветераны Даниял Шандиев келген эди. Даниял оьзи алдына байыр исин ашпага суьеди эм сол себептен социаллык контрактын аьзирлев ягыннан ярдам этпеге тилек эткен. Социаллык координаторы ветеранга документлерин аьзирлемеге ярдамын эткен эм программада катнасув уьшин тийисли кенъеслерин берген. Социаллык координатордынъ, профильли ведомстволардынъ эм ветераннынъ оьзининъ биргелес куллык этуьви аркасы ман социаллык контракты макул коьрилген. Даниял Шандиев оьзининъ байыр исин – уьй лаксасын аьзирлевге 300 мынъ маьнет акша коьмегин алган. Буьгуьнлерде ветеран оьз производствосын ашкан эм ердеслерин сапатлы таза продукциясы ман канагатлап турады. «Патшалыгымызга эм «Аталыкты коршалавшылар» фондтынъ филиалына уьйкен разылыгымды билдиремен. Мага берилген коьмек – ол тек акша тувыл. Ол мен буьгуьнги тынышлы яшавда да оьз ердеслериме керекли экенимди эм пайда аькелмеге болатаганыма сенимлик береди», – деген Даниял Шандиев