Сыйлы ердеслер, аявлы дослар!

Бизде Ногай районын оьрлендируьвдинъ бас соравлары бойынша тармаклы биргелес аьрекет этуьвдинъ практикасы оьз емисин береди. Сайлавлардан алдын кампания болжалында йолыгыслар барысында биз сизи мен депутатлык тапшырмаларды кепледик, а яшавшылар ман дайымлык байланыс тутув аркалы буьгуьнде этилеек ислердинъ актуальли программасын туьзуьвге эп болады, аьдемлердинъ тилеклери мен келисте приоритетлерди белгилеп. Ортага салынып ойласылатаган соравлар кенъ – олар туьрли тармакларды бийлейди эм бирерде заман болжаллары ман байланыста тезлик пен яшавга шыгарувды талаплайды. Заманнынъ кыс вакытына аьзирлик коьруьв болжалында айырым маьне коьлик-йол хозяйствосы аьлине берилди. Дагестан Республикасынынъ коьлик-йол хозяйствосынынъ министри Джамбулат Гаджиев пен яшавга шыгарылмага керек соравларды биргелес ойласув сырагылары бойынша Ногай район еринде кыс мезгилине аьзирлик коьруьв мен гравий тоьселген йоллардынъ, энъгил кесеклерин толтырып, уьстин туьзетуьв бойынша куллыклар басланган. Йол уьстин ийги аьлде саклавда эм йыл заманлары ара коьлик юруьвди канагатлавда бу шарадынъ бек маьнелиги бар. Айырым эс каратылды Червленные-Буруны авылына кируьв йолынынъ аьлине: мунда ерли яшавшылар ман йолыгыстан сонъ, йол кавыфсызлыгы ман байланыслы сорав оьткир турганда, «РСУ» АО директоры А.А.Магомедов пан биргелесте тезлик пен карар кабыл этилинип алынды. «РСУ» АО «Ногайский» филиалынынъ етекшиси Д.А.Караевке, ерли маьнелиги бар бу участокта йолдагы шукырларды тайдырып, ремонт ислерин уйгынлав тапшырмасы берилди – бу шара йол-юрис кавыфсызлыгын арттырувга себеплигин тийгистеди. Айырым разылыгымды билдиргим келеди Алибулат Ашаханович Магомедовка Ногай районы бойынша юритилмеге белгиленген планды заманында аьзирлегени уьшин. Сол план ман келисте «РСУ» АО-нынъ толтырылмага керек бас борышлары – Бораншы-Куьнбатар эм Арсланбек-Эдиге участокларда, кум-гравий ийленип, йол уьстине тоьселуьв мен байланыста ремонт ислерин озгарув. Бу шара авыр юк тасувда эм ийги тувыл ава шартларында йол уьстининъ берклигин арттырады. Маьнели илгерили абыт эсабында болды «РСУ» АО «Ногайский» филиалын техника ман яракландырув бойынша соравдынъ шешилуьви. Бюджет амалларынынъ танъкылыгын эсапка алув ман «РСУ» АО директоры А.А.Магомедов пан Дагестаннынъ сырт ериндеги йол сетьти канагатлав уьшин янъы грейдер коьлигин беруьв акында соьйлесилди. Коьлик Терекли-Мектеб филиалынынъ техника паркында ерлестирилеек. Ногай районынынъ узакка созылган йоллар узынлыгын эм яшав пунктлары ара эм конъысы ерлери ара уьйкен шакырымлар барын эсапка алув ман, техникадынъ соьйтип ерлестирилуьви керекли ислерди заманында этилуьвин эм йоллар аьлин саклавын арттырады. Бу уьйкен оьлшемли эм биргелес иске кирискенлерге разылыгымды билдиремен. Биргелес аьрекет этуьвдинъ сондай кеби борышлар шешилмеге керек ерлерге заманында эс каратпага эм исти ийги сырагылы этип толтырмага амал береди. Алибек Мурзаев, ДР Халк Йыйынынынъ депутаты