Бизим яслар ызгы йыллар оьз халкынынъ тарихи мен, онда ыз калдырган, оьрленуьвине уьлис коскан, белгили аьдемлери мен кызыксынадылар эм оьктемсийдилер. Сол зат бизди суьйиндирмей болмайды. Яслар халкымыздынъ айтылган увылларынынъ эм кызларынынъ эткен ислерине тек эс этип яде тергеп калмай, олардан коьрим алып, алдыга ымтыладылар.
Баска яслар ман бирге алдыга ымтылады А.Ш.Джанибеков атындагы школасынынъ 10-ншы «б» класс окувшысы Гульсина Карагулова. Янъыларда ол орыс тилиннен Савлайроссиялык сочинениелер конкурсында катнасып, 10-11-нши класслар окувшылар арасында школа, район эм регион кезеклеринде енъуьвши болган. Йыл сайын белгиленген конкурсы туьрли йосыклар ман озгарылады, бу йыл Гульсина «Саният соьз бен айтылып болмайтаган сезимлердинъ, ойлардынъ арасындагы аражы» деген барыста Сраждин Батыровка багысланган «Наьсип уьшин савболынъыз» деп аталган сочинение язган. Онынъ етекшиси – орыс тилиннен окытувшы Алтын Даутовна Агаспарова, окувшысына сосындай уьстинликке етисуьвинде ярдамшысы эм насихатшысы болып келген.