«Дагестаннынъ "йыл окытувшысы-2018» конкурсынынъ муниципаллык кезеги тамамланды. Белгиленген конкурста районымыздынъ туьрли школаларыннан 9 окытувшы ортакшылык этти. Районымызда сосы конкурс 21-нши кере озгарылады. Шара катнасувшылар 2 кезекли борышларда оьзлерин сынадылар. 1-нши кезеги – окытувшылык усталык, мунда  окытувшылар оьзининъ кеспилик усталыгын коьрсеттилер. 2-нши кезек – окув дериси, усталыкты арттырувдынъ негизли кеплерининъ бириси. Билимлендируьв тармагынынъ практикалык куллыгында уьйкен сулыбы болган специалистлер жюри сырасында эди. Олар окытувшыдынъ ортак маданиятына, эрудициясына, кеспилик усталыгына эс эттилер. Конкурс катнасувшылар видео, аудио материаллар, туьрли презентациялар кулландылар. 

Янъыларда А-Х.Ш.Джанибеков атындагы Терекли-Мектеб орта мектебинде, 1917-нши йылдагы революциядынъ 100 йыллыгына багысланып, «Октябрьдинъ саьбийлери» деген ятлав окув конкурсынынъ район кезеги оьтти. Мунда районымыздынъ школаларынынъ 5 -8-нши классларынынъ окувшылары катнастылар. Белгиленген шара балаларды озган юзйыллыкта болган уллы оьзгерислерди юреклериннен оьткерип, туьп маьнесине етуьв ниет пен озгарылды. Балалар окыган ятлавлардынъ темасы Россия империясынынъ бузылувына, уллы аьдемлери эм етимислерине, 20-ншы оьмирдинъ уллы енъуьвлерине багысланган эди. 
Конкурс бек кызыклы аьлде оьтти. Аьр бир катнасувшы окувшы ортага шыгувында шалысып окыды. Конкурс сырагылары бойынша 1-нши орынды Кадрия атындагы школадынъ 6-ншы классынынъ окувшысы Айна Мавлимбердиева бийледи. 2-нши орынга А-Х.Ш.Джанибеков атындагы школадынъ 8-нши классынынъ окувшысы Руслан Уразакаев эм Карасув авыл школасынынъ окувшылары Альвида Арунова эм Азиза Шомаева тийисли болдылар. 3-нши орынды Азифа Сагиндикова (Карагас авыл школасы, 6-ншы класс), Адильбек Тортаев (Карагас авыл школасы, 7-нши класс), Зарина Елгишиева (Эдиге авыл школасы, 6-ншы класс) боьлистилер. Баьри баргылы орынлар бийлегенлерге Билимлендируьв управлениесиннен Сый грамоталар тапшырылды. 
Бизим хабаршы.

Янъыларда Государственная Думадынъ Билимлендируьв эм илми бойынша комитетининъ катнасувы ман Дагестанда билимлендируьвдинъ сапатын ийгилендируьв соравлары каралды. Республика Аькимбасынынъ куллыгын юритуьвшидинъ, депутатлар корпусынынъ эм регион Оькиметининъ атыннан кенъестинъ катнасувшыларын Халк Йыйынынынъ Председатели Хизри Шихсаидов хошлады эм буьгуьнге дагестанлыларды кыйнайтаган маьселелерди атады.

Ата юрттан йырак ерлерде сагынувлы сезимлер оьткирленедилер усайды. Сол сезимлер йылда бир-эки кере болса да, мени ата- юртым Терекли-Мектебке аькелмей коймайдылар. Соьйтип мине йол да болды. Мине эсли тереклер кушаклаган яныма якын эсли мектеб. Мунда туьрли йылларда балаларды окытканлар белсен фольклоршы, ана тилин  тергевге коьп куьш салган белгили аьлимимиз Абдулхамид Джанибеков эм шоьл халкында уьйкен сый ман  пайдаланатаган оьрметли окытувшы ярыкландырувшымыз Муса Курманалиев. Мунда мен де биринши класска келип, он йыл узагында окыганман.

5-нши октябрь – окытувшы куьни

Окытувшы! Аьр заманларда да сыйлавга, оьрметлевге тийисли болып келеди. Окытувшы кесписин сайлаган аьдем дайым тувра йолда, колына туьскен аьр балады билимлер дуныясына алып бармага борышлы болады. Ол тек тийисли сабагын берип калмай, яшав аьллерине коьре де, маслагатларын да береди.

Янъыларда Дагестан Республикасынынъ илми эм билимлендируьв министерствосынынъ уйгынлавы ман республикалык «Энъ де ийги педагогикалык проект» деп аталып конкурс оьтти.

27-нши сентябрь – тербиялавшылар куьни

Ярасыклы тил – ишки дуныядынъ байлыгы

Балалар бавы – куьн саьвлесининъ булагы, саьбийлердинъ кызыклы ойынларынынъ ошагы болады. Мунда бир аьлемет ава, коьз алдынъда туьрли туьслер, бири-бириннен ярасык, ама оьз баскалыклары ман, кылыклары ман балалар. Соларды соьйлеп, ясап, бояп уьйрететаган тербиялавшылар. Йыл ишинде солар да кеспилик байрамларын белгилейдилер. Сол байрам алдында биз Терекли-Мектебтинъ «Юлдыз» балалар бавында конакта болдык. Бизди оьзининъ йылы куьлемсиреви мен, юмсак соьйлеви мен конаксуьер Солтанат Телемишева йолыкты. Ол оьзининъ тыпак ис коллективи акында тек ийги соьзлер айтады.

Россия – бизим суьйикли тувган элимиз. Онынъ шет кырыйсыз орманлары, тенъизлери, кырлары калай янга якын эм аьсирет! Кайдай оьктемлик сезими бийлейди бизди элимиздинъ ваькиллерининъ уьстинликлери акында эситкен аьсерде! Кайсымыздынъ да борышы – балаларда патриотлык сезимин тербиялав, олардынъ коьз алдында элимиздинъ сыйын оьстируьв, элимиздинъ онъайлыгы уьшин куьш салмага тийисли экенин анълатув. Сосындай мырат пан А.Джанибеков атындагы школасынынъ тарих дерисининъ окытувшысы Сабина Юнусовна Атюгеева 5 «б» класс пан «Келеекке ымтылган Россия» деген темага класс саьатин озгарды. Деристе конакта баслангыш класслардынъ окытувшысы Диана Рашидовна конакта болды.

Бизим элимиз Россия-баьтирлердинъ эли. Оьмирлер бойынша элимиз  олар ман оьктемсийди, эсинде саклайды, уьзилген яшавлары уьшин кайгырады.  Элимиздинъ баьтирлери  элин, исин, намысын оьз яшавыннан йогары салып оьлимсизликке абыт аладылар.

Озган юма савлай республикамызда Россия Баьтири Магомед Нурбагандовтынъ эстелигине багысланган шаралар туьрли окув ошакларында уйгынландылар. Солай ок Кадрия атындагы школадынъ 8-нши класслардынъ етекшилери Айшат Даирова эм Гульфира Аджимуллаева класс саьатин озгардылар.Класс саьатине «село Терекли-Мектеб» СП МО администрациясынынъ аькимбасы З.Аджибайрамов, школа директоры А.Акимова шакырылдылар.

Деристе окувшылар полиция лейтенанты М.Нурбагандовтынъ яшавы, ызгы куьни,онынъ атын оьлимсиз эткен йигитлиги акында хабарладылар, ятлавлар окыдылар. Деристе компьютер аркалы Россия Баьтири М.Нурбагандовтынъ оьлимнинъ коьзине коркпай карап  «Исленъиз, кардашлар!»-деген энъ ызгы соьзлерин айткан мезгили коьрсетилди. Ол соьзлер ыхтыяр саклав органларынынъ куллыкшыларына, савлай элимиздинъ ясларына 21-нши оьмирдинъ энъ де уллы явы-терроризм мен куьресуьвде шакырув болып калды. Тагы да компьютер аркалы онынъ ата-анасы Россия Президенти В.Путин мен йолыгыскан мезгили де коьрсетилди.

Деристинъ конагы З.Аджибайрамов та окувшыларга оьз маслагат соьзлерин айтты. Ол балаларды бас деп ийги окымага эм  уьйкенлерди сыйламага шакырды :

-Магомед Нурбагандовтынъ йигитлиги бизим дагестаншылардынъ сыйын коьтерди. Дагестаншылар акында  баскалай, ийги яктан айтып басладылар.Аьр бир ыхтыяр саклав органларына ислемеге келген аьдем элине, ерине алал болмага ант береди. Магомед берген антын оьлимнен коркпай ыслап билди. Дагестан халклары –бир уллы аьел. Биз окыган йылларда бир де миллет яктан айырым айтылмаганмыз, дайым да дагестаншылар деп оьктемсип айтатаган эдик.

 Россия Баьтирининъ эстелиги багысланган дерис балалар уьшин, оларды патриот яктан тербиялавда бек маьнели болды.

Н.Кожаева.

Суьвретте : йигитлик дерисиннен коьринис.